Home Top News and Stories Philippines News Headline Aklanon News: Aklan may P221-M nga pangbakae it bakuna kontra COVID-19

Aklanon News: Aklan may P221-M nga pangbakae it bakuna kontra COVID-19

0
   

Aklanon News: Aklan may P221-M nga pangbakae it bakuna kontra COVID-19

KALIBO, Aklan, Enero 22 (PIA) —  Preparado ro probinsya it Aklan sa pagbakae it bakuna  kontra sa COVID-19 ag iba pang mga gaeamiton bangud sa pag-aprobar it Sangguniang Panlalawigan it P221 milyones nga pundo nga pagagamiton para kara.

Ro pag aprobar hay ginpatigayon sa ika 79 nga regular nga session it Sangguniang Panlalawigan kurundaya eamang.

Ro pagpreparar it nasambit  nga balor it pundo hay bangud sa sangka resolusyon it Aklan Provincial Development Council (PDC) nga nagpangabay nga ieakot ro pundo sa Annual Investment Program it probinsya. Ro PDC hay ginapamunuan ni Governor Florencio T. Miraflores.

Base sa resolusyon, sa kabilugan nga balor it kwarta, P195 milyon ro gamiton nga pangbakae it bakuna, P5 milyon ro ibakae it mga refrigerator ag heringgilya, ag ro P21 milyon hay igabakae it pitong bilog nga ambulansya.

Una kara hay nagpahayag si Miraflores nga nakakoordinar eon sanda  sa kompaniya it AstraZeneca Phamaceuticals nga pagabakean nanda it bakuna.

Kon may una eon, gina-target it probinsya nga mabakunahan ro 70 porsyento it populasyon it Aklan ukon 420,000 nga mga residente nga gina kumpunihan it mga health care ag medical workers, mga pobreng pamilya, mga Pantawid Pamilya nga mga miyembro, ag mga unipormado nga mga personnel.

Plano man it gobyerno probinsyal nga bakunahan man ro mga nagatrabaho sa isla it Boracay agud siguraduhon nga euwas ag mapagsik ro mga tawo ngara.

Importante nga protektahan ro mga nagatrabaho sa Boracay, suno  kay Miraflores, bangud dapat masiguro ro kaeuwasan it mga bisita kon hibuksan eon ro isla sa tanan nga mga klase it turista. (JSC/VGV/PIA6 Aklan)