Home Top News and Stories Philippines News Headline Cebuano News: Pagproseso sa ani sa mga mag-uuma sa kape gipunting sa Cabadbadbaran

Cebuano News: Pagproseso sa ani sa mga mag-uuma sa kape gipunting sa Cabadbadbaran

0
   

Cebuano News: Pagproseso sa ani sa mga mag-uuma sa kape gipunting sa Cabadbadbaran

DAKBAYAN SA BUTUAN, Pebrero 19 –Gipunting nga masugdan na sa mga mag-uuma sa kape sa siyudad sa Cabadbaran ang pagproseso sa mga ani nila nga kape aron himoong “local regular coffee” karong tuiga.
 
Gawas kini sa gilantaw nga pagproseso sa civet coffee sa Sitio Pirada, Barangay Del Pilar sa maong dakbayan, sumala ni Ma. Arcelle Soria, ang city agriculturist.
 
Sumala kang Soria nga samtang naghulat ang mga mag-uuma sa panahon sa ting-ani sa kape, gisugdan na usab nila ang mga pagbansay kalabot sa paggama og kape, kaabag ang Department of Trade and Industry (DTI) nga maoy nagpasiugda sa mga trainings, partikular sa Sitio Ansili, Barangay Puting Bato.
 
Target nga mag-ani sa ilang produksyon sa kape ang mga mag-uuma sa pinaka-ulahing kwarter ning tuiga, tukmang panahon lang aron mahuman sa pagtuon ang mga mag-uuma nga interesadong magproseso sa kape.
 
Dugang ni Soria nga sa kasamtangan nagpadaghan pa og mga civets kon milo ang potensyal nga lugar sa Sitio Pirada, diin ang mga fermented coffee beans nga i-digest niini mao ang kolektahon aron iproseso nga mahimong civet coffee.
 
Nangita na usab og dugang nga mga sites ang City Agriculture Office (CAO) sa Cabadbaran alang sa dugang nga kapahilunaan sa pagpalambo sa civet coffee, lakip na ang tourism site nga maoy kabutangan sa mga produkto na unya sa kape.
 
Gilantaw nga dakung potensyal sa Agri-tourism ang gibansagang “Higanteng Bato” nga nahimutang sa kabukiran sa Sitio Pirada, ug potensyal nga mahimong kabahin sa ‘hiking site’.

Gibisita na sa Plant! Plant! Plant! Team sa Agusan UP ang lugar sa nakalabay’ng tuig, diin makita ang daku kaayong bato. Ilawom niini nagdagayday ang tin-aw ug bugnaw nga tubig sa busay nga makahupay sa kainit sa mga mahimong hikers.
 
Sa kinatibuk-an, gilantaw sa AGUSAN UP!, ubos sa Process! Process! Process! Project niini, nga makapahiluna og matawag nga coffee network nga magsilbing consolidator, processor ug coffee shop nga magsilbing site usab sa turismo sa nailang mga tourism areas sa probinsya.
Ang AGUSAN UP! mao ang kampanya sa pagpalambo sa administrasyon ni Gov. Dale B. Corvera kaabag ang buhatan ni Kong. Angel Amante-Matba. (Angel Lyn F. Gaviola, Agusan Up, LGU-Agusan del Norte/PIA Agusan del Norte)