Kinaray-a News: Anay mga rebelde nagbalik sa sabak kang gobyerno

SAN JOSE, Antique, Hunyo 27 (PIA) —  Gindayaw ni Gov. Rhodora Cadiao ang desisyon kang 11 ka mga anay nga mga rebelde nga nagbalik sa sabak kang gobyerno matapos kang andang tinuig nga pagpamatuk sa gobyerno.

Suno kay Cadiao, ang kadya nga mga returnees naghimo kang mabudlay apang insakto nga desisyon sa andang tikang nga magbalik sa gobyerno.

Ginpasiguro kang gobernadora nga ang anang administrasyon kaupod ni House Deputy Speaker Loren Legarda kag mga alkalde ang magahimo kang labing maayo nga tikang agud mapalapit ang serbisyo kang gobyerno sa mga katawhan.

Sa bahin kang Philippine Army, ginpahayag ni 61IB Commanding Officer Colonel Joel Benedict Batara nga ang Provincial Task Force to End Local Communist and Armed Conflict (PTF-ELCAC) rugya sa Antique nagapaninguha kang malinong kag padayon nga kauswagan kang probinsya.

Dugang pa, ang pag-sungka kang mga former rebel nagapakita lamang nga wara dun tanda nagatugro kang suporta sa mga kawsa kang New People’s Army tungod sa mga terorista nga pang-gawi kag pagbinutig nga ginhimo kang andang mga lideres.

Nagpasiguro man si Batara nga magapatigayon kang Enhanced Comprehensive Local Integration Program (E-CLIP) ang gobyerno sa mga former rebels agud makasugod sanda kang bag-o nga pagpangabuhi.

Sangka comprehensibo nga programa ang E-CLIP kun sa diin gina-tipon ang serbisyo kang gobyerno agud makatugro kang bulig sa mga anay nga rebelde.

Sa pihak nga bahin, magapaidalom naman sa proseso kang “deradicalization” ang mga anay nga rebelde agud makabalik liwan sa andang pamilya kag komonidad.  

Suno naman sa pahayag ni Peace and Order and Public Safety Consultant Margie Gadian, ana nga ginpasigurado nga ang gobyerno probinsyal sinsero sa pagsuporta kananda.

Magatugro kang pinansyal nga bulig ang gobyerno probinsyal kaupod ni Legarda sa mga returnees pinaagi sa Aid to Individual in Crisis Situation (AICS).

Nalakip man sa mga ahensya kang gobyerno nga may programa angot kananda amo ang Department of Agriculture (DA), Department of Labor and Employment (DOLE), Technical Education and Skills Development Authority (TESDA), kag Department of Trade and Industry (DTI). (JSC/LML/PIA6 Antique)