DA-10 mitunol ug hinabang sa mga mag-uuma sa Talakag 

TALAKAG, Bukidnon, Hulyo 1 (PIA) — Atol sa gihimong pag-lunsad sa Poverty Reduction. Livelihood and Employment Cluster sa Barangay Lantud ning maong lungsod nga gipanguluhan sa Teschnical Edu ation and Skills Development Authority (TESDA), mitunol ang Department of Agriculture (DA)-10 ug mga hinabang ngadtu sa mga mag-uuma nga kasagaran mga sakup sa tribung Higaonon-Maranao. 

 Mitambong ang mga nagkalain-laing ahensya sa gobyerno atol sa maong kalihukan dala ang ilang mga hinabang sa mga molupyo sa Lantud isip pagsanong sa mando ni President Rodrigo Roa Duterte ubos sa Orden Ehekutibo numero 70 nga nag-awhag sa hini-usang aksyon sa pagsulbad sa kalisud aron mahunong na ang lokal nga kagubot gumikan sa komunistang pundok.

 Nanghatag ang DA ug 70 ka sakong binhi sa hybrid nga mais nga nagkantidad og P350,000 ug lima sa sakong binhi sa humay para sa basakan, pahibalo ni DA-10 Field Operations Division Agriculturist Audy G. Maagad.

 Gipaambit usab niya ang High-Value Commercial Crops Development Program (HVCDP) diin naghatag sila’g mga binhi nga nagkantidad og P25,000 ug 100 ka mga seedling trays nga nagkantidad og P5,000.

 Aron mapadayon nga pag-pauswag sa kahibalo sa agrikultura sa mga IP sa Talakag, gipaambit usab ni Maagad ang ilang 4Ks (Kabuhayan, Kaunlaran, ng Kababayan Katutubo) nga adunay gipanghatag nga mga gamit sa pangtanum sama sa mga pandilig, organic fertilizer nga mikabat sa P37,750.

 “Kon motubo ang ilang mga tanum, dili lang nga aduna silang maka-on, makapaligya pagyud sila. Ang mga utanon daku ug ikatabang nga makapalig-on sa ilang panglawas, dugang pa niya.  (VPSBautista/PIA10)