Tagalog News: Bagong gusali ng Romblon PPO, pinasinayaan

ODIONGAN, Romblon, Hul. 1 (PIA) — Pinasinayaan na kamakailan ang bagong gusali ng headquarters ng Romblon Police Provincial Office (PPO) sa bayan ng Romblon, Romblon.

Ang nasabing inagurasyon ay pinangunahan nina PBGen. Nicerio Obaob, Regional Director ng PNP Mimaropa at dinaluhan naman nina Romblon Cong. Eleandro Jesus Madrona, Gov. Jose Riano, Alkalde ng bayan ng Romblon na si Mayor Gerard S Montojo at ni Police Col. Arvin Molina, Provincial Director ng Romblon PPO.

Ang nasabing tatlong-palapag na gusali ay malaking tulong aniya sa mga kapulisan dahil maaliwas ang loob nito at malapad para sa mga tinatanggap nilang mga bisita o di kaya ay may transaksyon sa headquarters.

Sa mensahe ni Governor Riano sa nasabing inagurasyon, pinasalamatan nito ang mga kapulisan sa Romblon sa pangunguna ni Police Col. Arvin Molina sa tulong nila sa pagbabantay sa mga kalsada at entry points ng probinsya lalo na ngayong nahaharap ang bansa sa pandemic na COVID-19.

Aniya, malaking bagay ang pagbabantay ng mga kapulisan mula umaga hanggang sa gabi dahil marami ang talagang nanatili sa kanilang bahay lalo noong nagpapatupad pa ng enhanced community quarantine. (PJF/PIA-Mimaropa)