LUNGSOD NG LUCENA, Hulyo 15 (PIA) — Isang (1) balintong o kilala sa tawag na Philippine pangolin (Manis culionensis) ang nai-turn over kahapon (July 14) sa tanggapan ng Department of Environment and Natural Resources – City Environment Natural Resources (DENR- CENRO) Calaca, Batangas matapos makatanggap ng tawag mula sa munisipyo ng Balayan, Batangas.

Ayon sa ulat ng DENR, ang nasabing buhay-ilang ay naiulat na napadpad sa bakuran ng isang residente ng Brgy. Tanggoy, Balayan, Batangas habang kalakasan ng ulan noong Hulyo 13, 2020 bandang alas-10 ng gabi.

Noong gabi ding iyon, ay agad namang isinangguni ng mga residente ang nahuling buhay-ilang sa Kapitan ng Brgy. Tanggoy at siya namang nakipag-ugnayan sa tanggapan MENRO- Balayan upang ma rescue.

Ang balintong (one who rolls over) ay isang pangolin species na endemic mula sa Palawan.

Ang tahanan nito ay mula sa primarya at sekondaryang kagubatan at sa mga madadamong lugar (grasslands).

Kasama ang balintong sa listahan ng mga nanganganib na maglaho o “Critically endangered” ng International Union for Conservation of Nature (IUCN) at ng Palawan Council for Sustainable Development (PCSD) sapagkat ito ay pinakapalagiang ipinupuslit ng ilegal sa ibang bansa dahil sa pinaniniwalaan umano itong nakapagpapagaling ng iba’t-ibang sakit.

Nabubuhay ito ng 20 taon; “nocturnal and reclusive;” aktibo sa gabi kahit mahina ang paningin ay bumabawi lang siya sa lakas ng pang- amoy bilang depensa.

Mabagal rin ang paglakad, ngunit mabilis ang depensa pag may panganib. Nagtatago ito sa “tree canopy” at naglalabas ng mabahong amoy/ likido at ibinibilot ang katawan (roll over) sa oras ng panganib.

Kung kumakain ang pangolin ng langgam/o tumpok ng anay, hindi nito inuubos o sinasaid lahat, bagkus ay nagtitira upang may mabalikan o makuha ang iba nitong kasamahan.

Critically endangered din ito sapagkat kalimitan ay isa lang ang nagiging anak nito at dala-dala nito hanggang 4 buwan bago mahiwalay sa ina.

Pinaaalalahanan ng DENR CENRO Calaca ang lahat na mahigpit na pinagbabawal ang pagpatay, pagkakalakal, pangkokolekta, pangangaso, pagmamaltrato, pagbiyahe, at pagsira sa tirahan ng mga buhay-ilang o “wildlife” ayon sa Batas R.A 9147 o Wildlife Resources and Conservation Act. (CPC/IDPD with additional information from DENR CENRO)